Cantas vidas poden ocupar a vida dunha persoa ?
- Detalles
- Publicado o Domingo, 21 Marzo 2010 16:33
Fai anos pensaba que as persoas que viven varias vidas sustentaban esa situación sobre unha cimentación de mentiras e enganos. Era así porque esa era a percepción que tiña da vida en función da observación da realidade circundante.
Pensaba tamén que isto podía deberse, nalgúns casos, a un trastorno bipolar ou a unha enfermidade psicótica.
A miña condición de ateo, e por ende a non crenza noutras vidas previas ou por vir, sempre mantivo en min a curiosidade por saber como sería a vida desas persoas que levan vidas múltiples, con dúas ou máis familias, en distintas cidades e con diferentes compañeiros de traballo e amizades .
En épocas duras, de infelicidade, que tamén as houbo, tiña a fantasía de fuxir e comezar unha nova vida dende cero, cunha nova identidade, nun novo país e cunhas circunstancias vitais distintas.
Agora son feliz e podo comprobar que se poden ter varias vidas nunha mesma vida. Vidas completamente diferentes. Por suposto en función das diferentes etapas que a propia vida te depara pero tamén vidas paralelas e complementarias no mesmo tempo. Vidas intensas e en compaña das persoas que amas, sen mentiras, sen enganos, sen hipocrisía.
Son vidas da mesma personaxe. Non son heterónimos creados, coma os de Fernando Pessoa. Son reais e teñen conciencia do ser e do estar.
So se trata de vivir con paixón e entrega, con liberdade e con compromiso, con equilibrio e con seguridade. As persoas temos un mundo por explorar. Trátase dunha aposta transgresora, diría máis, revolucionaria.
As persoas afortunadamente somos poliédricas so temos que descubrilo... a dubida é: cantas vidas se poden vivir durante unha vida?
Espero respostas.